GovTech Lab Luxembourg

© MinDigital

Aleedung

De Lëtzebuerger Staat verfügt neierdéngs iwwer ee GovTech Lab, deen d'GovTech an d'oppen Innovatioun matenee kombinéiert, fir d'Entwécklung vun den digitalen ëffentleche Servicer ze beschleunegen.

D'Zilsetzung vum GovTech Lab, deen aus enger Zesummenaarbecht tëschent dem Digitaliséierungsministère a senger technologescher Hand, dem staatlechen Zenter fir Informatiounstechnologien (CTIE), entstanen ass, ass et, eng Kultur vun Innovatioun a Verännerung beim Staat ze encouragéieren an ze ënnerstëtzen. De GovTech Lab gräift op d’Expertis vun externen Acteure zeréck (Privatsektor, Fuerschung, Bildung), fir nei Léisungen z’entwéckelen, mam Zil bestehend staatlech Prozeduren a Workflows nei ze gestalten. 

De Grondgedanke vum Lab ka mat follgende Wierder resuméiert ginn: experiment, exchange, innovate.

Firwat ee GovTech Lab zu Lëtzebuerg?

Eng vun de strategeschen Achse vum Ministère ass et, d’Innovatioun bannent dem Staat ze beschleunegen an de GovTech Lab ass eng vun den Aktiounen, déi den Digitaliséierungsministère an dësem Beräich ëmsetzt.

Wat bedeit GovTech?

De Begrëff GovTech ass relativ rezent a bezeechent d'Benotzen oder d'Entwécklung vun technologesche Léisungen, déi d'digital Transformatioun vum ëffentleche Secteur virundreiwe sollen, mam Zil, d'Qualitéit vun de Servicer géintiwwer de Bierger an de Betriber ze verbesseren an iwwer méi gëeegent Tools ze verfügen, déi d'Effizienz vun den ëffentleche Verwaltungen ënnerstëtzen.

Méi genee representéiere bzw. ënnerstëtzen d'GovTech d'Evolutioun zum Digital Government, dee sech duerch einfach, sécher, zougänglech an effizient Servicer fir d'Bierger charakteriséiert. Wuertwiertlech steet GovTech fir "Technologië fir d'Regierung", opgebaut wéi d'Begrëffer FinTech ("Technologië fir d'Finanzen") oder MedTech ("Technologië fir d’Gesondheet"). Allerdéngs ëmfaassen d'GovTech eng méi breet Palett vun Aktiounen, déi den ëffentleche Secteur méi gewieweg a méi orientéiert op d'Innovatioun maache sollen, fir esou d’ëffentlech Servicer technologesch méi funktionell ze gestalten.

Wat bedeit oppen Innovatioun?

Allgemeng entsprécht d'oppen Innovatioun all den Innovatiounsprozeduren, déi op Deelen an Zesummenaarbecht baséieren. Si soll op Kenntnisser ausserhalb vun hirem gewéinlechen Ëmfeld zeréckgräifen, fir ze vermeiden, datt isoléiert geschafft gëtt.

Dës extern Kenntnisser beräicheren d'Innovatiounsaktivitéiten a stellen e grousse Virdeel duer: D'Iddie gi besser mat de besteeënde Besoine verbonnen a ginn och éischter den Erwaardunge vun de Benotzer gerecht. D'Entwécklungsléisunge fërderen d'Qualitéit vun den erziilten Iddien a verstäerken d'Rapiditéit vun der technologescher Entwécklung.

D'Benotze vu der oppener Innovatioun an dem ëffentleche Secteur huet d'Zilsetzung, déi besteeënd extern Kenntnisser ze benotzen, dat heescht, d'Aféiere vun Iddien, Kompetenzen oder innovativen Technologië vun Entreprisen, Start-uppen, Selbstännegen/Freelancer, Studenten oder Fuerscher, déi d'Innovatioun beim Staat wëllen ënnerstëtzen a verstäerken.  Dës Methodologie ass am private Secteur scho wäit verbreet, a mam GovTech Lab gëtt se elo och am lëtzebuergeschen ëffentleche Secteur agefouert.

D'Missioune vum GovTech Lab

De GovTech Lab huet zwou Missiounen, fir dem Zil vum Digitaliséierungsministère a vum CTIE gerecht ze sinn.

Mat "Calls for challenges" an "Calls for solutions" d'Innovatioun beim Staat beschleunegen

D’Defien, déi vun de Ministèren an Verwaltungen iwwer d’GovTech-Community oder all Joer am Kader vum "Tech-in-GOV"-Opruff gesammelt ginn, ginn an "Calls for solutions" ëmgewandelt, fir innovativ Léisungen an engem iterative Prozess ze entwéckelen. De GovTech Lab setzt zwee verschidden Instrumenter an, fir mat externen Acteure zesummen ze schaffen: d’Innovatiounspartnerschaft an de SpeedUP.

D'Innovatiounspartnerschaft ass eng Prozedur vun enger Dauer vun 8-14 Méint, déi manner restriktiv wéi aner ëffentlech Ausschreiwungen ass, wouduerch méi extern Acteuren deelhuele kënnen. Am Kader vun dëser Partnerschaft ginn d’Kandidaten als éischt gefrot, hir Konzepter anzereechen. Spéider am Prozess presentéieren si hir innovativ Léisungen virun engem Jury deen sech zesummesetzt aus Membere vum Digitaliséierungsministère, vum CTIE, vun der Verwaltung, déi den Challenge proposéiert huet, an aus externen Experten, déi jee nom Thema vum "Call for solutions" ausgewielt ginn.

De SpeedUP ass eng 2 Méiglechkeet fir "Calls for solutions" ze lancéieren. Säin Zweck, seng Dauer an de Verlaf ënnerscheede sech vun deene vun der Innovatiounspartnerschaft. Et kann sech ëm d’Sich no enger innovativer oder scho bestehender technologescher Léisung handelen, mee och ëm eng juristesch Analyse oder ee Konzeptvirschlag. Beim SpeedUP kënnen interesséiert wirtschaftlech Acteure un dëser Form vun ëffentlechem Marché deelhuelen, andeems si eng Offer fir d’Liwwerung vun der gewënschter Léisung, Etude oder Konzept maachen.

Eng GovTech-Communautéit zu Lëtzebuerg opbauen

Den Opbau vun der GovTech-Community zu Lëtzebuerg huet zum Zil, eng Innovatiounskultur bannent dem Staat ze fërderen. Dës Community besteet aus Beamten, déi sech fir GovTech interesséieren, souwéi aus externen Acteuren wéi Start-ups, Fuerscher an Entreprisen. D'Netzwierk vum GovTech Lab gëtt haaptsächlech duerch verschidden Eventer gefërdert, déi op der Plaz organiséiert ginn. Dës Eventer kënnen Hackathons, Designathons, Echangen, Workshops oder Formatiounen ëmfaassen.

Interesséiert Persoune kënnen der GovTech-Community bäitrieden, andeems si d‘Newsletter vum GovTech Lab abonnéieren.